Olih Nyoman Manda
Sebun kedis wantah pakarangan i kedis genah ipun nginkinang nglekadang pianakné, miara pianakné kanti ia bisa makeber ngalih amah cara inané. Sapunika tingkah i kedis sané nyebun ngrimbun ring punyan taruné ageng. Pianak kedisé saling tengkungin lan saling enjur anjurin mawinan ipun kantos uning napi patut satingkah kedisé pakacoscos, pakaberber tan naenin kaajahin olih inan i kedisé. Nyebun ngrimbun di punyan taruné ageng punika sahanan paripolah i kedis. Jeg sampun uning makeber sakadi wantah kénten aban-abané saking kadituané.
Solah kedis nyebun di taruné ngrembun sakadi asapunika solah kramané ring Désa Keramas Gianyar ring pangarjan. Jeg kénkén kadén undukné di sahanan Désa Pakraman Keramas, Blahbatuh, Gianyar uling kauh ngantos kangin, kelod ngantos kaja sabilang bucu jeg uning sampun macekéran lan masolah arja. Yan soang-soang banjar pacang nangunang sekaa arja jeg prajani mrasidayang, saking alit kantos bajang teruna dija ja jemak jeg prasida sampun nyolahang raga dados arja. Désak bulan, limbur, galuh mantri, penasar, lan wijil jeg aluh sampun baan milih, kénten naenin pakaengan Bapa Wayan Togog sané sampun ten kantun nyeneng. Yan nangunang arja driki wantah ngalusang ten malih saking dasar. Yan jejeleg limbur yan sampun mokoh icénin nyemak igel lan agem limbur jeg mresidayang, taler kénten yan ngrereh galuh lan mantri. Ten ja manggihin sekil pisan wantah natar kémaon. Panguruk arja puniki maosang, driki ring Désa Keramas sarahina ring paumahan jeg agem lan gending arja ngwarnain palemahan désané. Nika mawinan saking riin Désa Keramas mula kasub antuk sekaa arja sané nyebun. Wus amasa ané lingsir jeg sampun wénten nyambung sekaa alit lan bajang. Ring soang-soang paumahan sampun biasa sarahina agem lan gegendingan arja kasolahang. Saking ulih nolih lan mirengang jeg sampun uning ngagem lan ngendingang arja. Napi malih ring sekolah ring Keramas manawi samian yén muridé orahin magambel, magending lan ngigel arja ten ja bakal nyukilang krana sampun biasa piragina ring jumahnyané wiadin ring balé banjaré. Sakadi ring SD I Keramas wénten muridnyané sané ngantos polih ngigel ka Perancis sareng rombongan arja Abianbasé Gianyar. Nika mawinan yan ngawéntenang ekstrakurikuler arja ring sekolah nénten ja banget pisan guruné bakal ngajahin krana muridné sampun biasa miragi gending lan igel arja di jumahné wiadin di balé banjaré. Krana punika yan ring Pesta Kesenian Bali wénten pacentokan arja saking sané alit kantos sané sampun biasa ngigel pastika saking Keramas sané kajudi ngwakilin Kabupaten Gianyar.
Indik arja nyebun ring Désa Keramas puniki mawinin patut kapikayunin olih Pemkab Gianyar madandanan saking Dinas Kebudayaanné mangda setata ngwantu kawéntenan arja nyebun ring Keramas manawi ngwantu gambelan ring soang-soang SD, SMP wiadin kantos SMU sané wénten ring Désa Keramas. Taler kawéntenan sekaa arja ring banjar mangda taler kapikayunin polih wantuan lan setata rerehang galah mangda prasida nglantur pasolahannyané sakadi ri tatkala HUT Gianyar sané sampun ramé pisan mangda arja nyebun lan sekaa seni tiosan prasida masolah ngraméang HUT Gianyar sané meriah punika. Mangda ri tatkala HUT punika sekaa arja lan sekaa seni tiosan mangda kaupah olih Pemkab sané manawi kabiayain olih sponsor. Dadosné wénten parungu Pemkab ring sekaa seni sakadi sekaa nyebun arjané puniki.
Arja nyebun ring Keramas saking yusa alit kantos anak lingsir sampun pastika becik kawéntenannyané. Désa pakraman sakadi puniki sané madué kalebihan tulis gidat pakraman seni arja jeg tumbuh becik alami, patut pisan kaantenin lan kawrediang kawéntenannyané. Manawi sesebunan arja ring Keramas lan sesebunan seni tiosan ring Gianyar sakadi wayang kulit ring Banjar Bakbakan Sukawati, seni barong ring Singapadu lan Batubulan, cak ring Bona, legong ring Peliatan/Ubud, Gambuh ring Batuan, Wayang wong ring Klepud, Tegalalang sané mawinan Gianyar kasengguh kerumpu seni, niki patut rerehang galah lan uratiang mangda prasida setata panjang nulus maurip. Manawi balai budaya lan saputarannyané dadosang Art Centre ring Gianyar mangda prasida seni nyebun sakadi seni arja Keramas punika setata polih galah masolah sané kaupah lan kawantu olih Pemkab Gianyar. Manawi yan kabrebehan yan lapangané kaanggé sesolahan aréal seni, manawi Terminal/Gor Keboiwo Gianyar sadurung mawiguna dados terminal kantos mangkin becikang anggé Sport Centre (sampun macihna becik pisan sadaweg wénten kejuaraan bola volly Porda Bali) mangda kegiatan seni lan olahraga ring Gianyar pada kalimbakang lan kawrediang kauripannyané sakadi arja nyebun Keramas sané prasida ngamiikang gumi Gianyaré!
Free Template Blogger collection template Hot Deals BERITA_wongANteng SEO theproperty-developer
0 komentar:
Posting Komentar