Angker

Olih I Nengah Konten

Yéning pitakenang ring sang sané sampun madué kawikanan ring kawéntenan indik supra natural, sané baosang angker, inggih punika dané ngandikayang angker punika kabaosang wantah genah sané ngangobin utawi nakutin, kabaos ngangobin karana rupan ipuné lan wentukné sios ring sakadi sané siosan, salanturnyané dané maosang genah-genah sané kabaos angker punika wénten ring batu sané ageng, taru sané ageng, wawidangan sané bet, lan sané siosan duaning sané sakadi asapunika kocap madaging kekuatan gaib, mawinan asapunika? Manawita genahé sané sakadi punika kagenahin olih roh-roh alus. Indik sané sakadi punika wantah kepercayaan duk nguni, punika sané kabaos kepercayaan animisme lan dinamisme. Kepercayaan animisme lan dinamisme maosang maka sami benda-bendané sané wénten ring jagaté madaging kekuatan gaib lan roh. Yéning ruruh-ruruhin ring dija kémanten yéning wénten batu ageng lan taru ageng ring sampingné majanten sampun kadagingin utawi kawangunin tugu, tugu punika wantah genah ngalinggihang roh-roh alus punika, punika matetujon mangda roh-roh alus punika nenten ganggu sang sapa sira sané nglintangin utawi sang sané rauh merika.

Siosan ring batu ageng lan taru sané ageng kabaos angker, wénten taler margi sané kabaos angker. Margi sané kabaos angker, inggih punika patemon margi antara margi, ring puser patemoné punika kabaos catus pata utawi tri pata, duaning ring catus pata utawi tri pata punika kabaos petemon kala. Sané kabaos catus pata inggih punika patemon kangin kalawan kauh, kaja kalawan kelod, ring puser patemon punika kabaos pempatan agung. Sané kabaos tri pata inggih punika patemon kaja kalawan kelod lan kalawan kangin utawi kaja kalawan kelod lan kalawan kauh, kangin kalawan kauh lan kalawan kelod utawi kangin kalawan kauh lan kalawan kaja, ring puser patemon punika kabaos pertigaan agung, patemon-patemon margi sane sakadi punika taler kabaos patemon kala, napi mawinan sané sakadi punika kabaos patemon kala? Asapuniki indikné, puniki wantah imba, wénten patemon rahina kalawan wengi, patemon sakadi punika kabaos sandi kala, krana patemoné sakadi punika ngwetuang kala, kala punika sané kabaos angker, napi ngawinang asapunika? Duaning kala punika kagambarang antuk rupa-rupa sané angker utawi kawentukang antuk arca sané madaging taring, kabaos angker krana rupan ipun ngangobin utawi nakutin. Siosan ring punika wénten taler kabaos kala inggih punika patemon surya-bulan-bumi utawi surya-bumi-bulan, genah ipuné majejer, patemon sakadi punika kabaos suryané kapaangan utawi ulané kapaangan, manut pangandikan anak lingsir indiké sané sakadi punika baosanga suryané utawi bulané katadah olih Sang Kala Rau. Sakadi sané sampun kabaosang ba duur taru ageng, batu ageng, lan kala. Krana rupan ipun banget ngangobin utawi nakutin ipun kabos angker.

Wénten malih sané kabaos angker upaminé wénten pakarangan lami kakaonin olih sang sané nruwénang, krana pakaranganné lami kakonin sangkaning ngruruh karya kadura negara utawi kakaonin séda utawi mati, pakarangané punika nénten wénten sané genahin turmaning meriksain, i rika raris roh-roh alus sané ngenahin utawi ngranjingin, kasuén-suén pakaranganné punika penadosné angker, duaning roh-roh alus sané ngenahin utawi ngranjingin.

Boya ja roh-roh alus lan kala punika kabaos wantah madué sifat-sifat sané jahat kémanten, nanging madué taler sifat-sifat sané becik, ipun becik yéning i raga urati ring kawéntenan ipuné, kauratiané prasida i raga ngwehin panyomia utawi labaan, ri sampuné asapunika parilaksana i ragané ring roh-roh alus lan sang kala ipun prasida kaanggé prakanti utawi sawitra, nujuning rerahinan kajeng kliwon utawi rerahinan sané siosan, wéhin ipun panyomia utawi labaan sané marupa segehan utawi kepelan, krana ipun banget seneng ring sané asapunika, yéning kasenengan ipuné sampun madaging ipun nenten pacang ngrubeda.

Free Template Blogger collection template Hot Deals BERITA_wongANteng SEO theproperty-developer