Sekaa Shanti Gita Swara Aéro Catering Service
Yaning makarya ring catering biasané maka sami pada wikan makarya lan nata ajeng-ajengan. Sakéwanten boya ja nika manten kawikanan karyawan PT Aéro Wisata Catering Service Ngurah Rai puniki. Makéh para karyawan catering puniki sané wikan magegitan. Kawéntenan punika mamargi duaning pimpinan widang PT Aéro Wisata Catering Service (ACS) Ngurah Rai setata mawanti-wanti mangda para pangremba lan panyanggra tamiu puniki nénten marasa wadih makarya. Raris duk asasih sané sampun lintang metu manahnyané makarya paiketan mashanti anggén nglimurang manah. Pangremba sané nyarengin makarya kapupulin ngantos ngamolihin 12 anggota, saking anggota puniki raris katangiang sekaa shanti. Duaning maka sami anggotanyané saking PT ACS Ngurah Rai, dadosné sekaa shantiné kawastanin Sekaa Shanti Gita Swara Aéro Wisata Catering Service.
Kawéntenan Sekaa Shanti Gita Swara Aéro Wisata Catering Service, ring bandara Ngurah Rai, Kuta Badung puniki kaprakarsang olih I Nyoman Sukasta HRM sané pinaka Ketua Bimbingan Rohani, lan Ni Nengah Subagiati miwah Komang Indra Diatmika.
Manut I Wayan Sukasta tetujon sekaa shanti punika mangda maka sami pegawai polih ngibur lan dados jadma sané maguna ring jagaté. Taler mangda prasida ngayah ring kantor lan jero suang-suang ri kala wénten patoyan wiadin karya.
Mangda kauningin olih para pegawai perusahan-perusahan siosan lan pamiarsa Bali TV-né, Sekaa Shanti Gita Swara ACS ngayah mashanti ring Bali TV rahina Saniscara, 2 Juni 2007 lintang. Irika sekaa shanti puniki ngawedar indik utsaha ngajegang seni lan budaya.
Ayah-ayahan mawirama puniki kaamong olih kutus pangwacén lan paneges. Maka sami pupuh sané kaanggé nguningang indik ngajegang seni lan budaya Baliné punika yakti ngulangunin pisan. Pupuh Ginanti sané kawacén olih I Wayan Wana lan kategesang olih I Wayan Jenek punika mapateges mangda para janané sami mautsaha ngulati kawigunan geginan miwah kaweruhannyané, mangda tan lali ring seni budaya Baliné.
“Ngiring kukuhang lestariang, lan lanturang budaya leluhur druéné majalaran antuk karya bhakti ring warisan leluhur sané sampun kasumbung punika. Taler titiang nunas mangda para pegawai perusahan sané siosan éling ring raga, malajah ngulati geginan lan ngayah punika sané patut kautamayang. Ngiring miletin sekaa shanti ring perusahaan-perusahan utamané sané magama Hindu ring dija ja magenah, magda prasida madué manah shanti. Saking manah shanti prasida nincep anggén ngulati peplajahan lan kakaryan,” baos I Putu Sudiarta silih tunggil anggota Sekaa Shanti Gita Swara Aéro Wisata Catering Service puniki. (ana)
Free Template Blogger collection template Hot Deals BERITA_wongANteng SEO theproperty-developer
0 komentar:
Posting Komentar